Yaponların yeni fitnes sirri “aralıklı yürüyüş” texnikası son günlər sosial şəbəkələrdə və sağlamlıq dünyasında geniş yayılıb. Bu üsul qısa müddətli sürətli və yavaş templə yerimənin növbəli şəkildə tətbiqinə əsaslanır. “Aralıklı yürüyüş” kimi tanınan bu metodun həm dözümlülüyü artırdığı, həm də yağ yandırma prosesini dəstəklədiyi bildirilir. Xüsusilə vaxtı az olan insanlar üçün sadə və praktik bir alternativ kimi diqqət çəkir.
Sfera.az xəbər verir ki, “aralıklı yürüyüş” müəyyən vaxt intervallarında sürətli və yavaş yerimənin dəyişdirilməsi ilə həyata keçirilən məşq formasıdır. Məqsəd ürək döyüntüsünü nəzarətli şəkildə yüksəldib endirərək bədənin daha effektiv işləməsini təmin etməkdir. Bu texnika ilk dəfə Yaponiyada yaşlı insanlar üzərində aparılan araşdırmalarla populyarlaşsa da sonradan dünya üzrə fitnes proqramlarında da yer almağa başlayıb.
Bu üsulun tətbiqi olduqca sadədir və xüsusi avadanlıq tələb etmir. Adətən 3 dəqiqə sürətli tempdə yerimə, daha sonra 3 dəqiqə yavaş tempdə yerimə formasında icra olunur. Bu dövrə təxminən 5 dəfə təkrarlanır və ümumi məşq müddəti 30 dəqiqəyə yaxın olur. Sürətli yürüş zamanı nəfəsin artması normal sayılır, lakin danışa biləcək səviyyədə qalmaq tövsiyə edilir. Yavaş temp isə bərpa mərhələsi kimi qəbul edilir.
Mütəxəssislərin fikrincə, “aralıklı yürüyüş”ün mütəmadi tətbiqi ürək-damar sağlamlığını dəstəkləyə, yağ yandırmanı sürətləndirə, fiziki dözümlülüyü artıra və metabolizmanı aktivləşdirə bilər. Eyni zamanda aşağı zədə riski ilə həyata keçirilən təhlükəsiz bir məşq forması hesab olunur.
Bu texnika idmana yeni başlayanlardan tutmuş yaşlı insanlara qədər geniş bir kütlə üçün uyğun sayılır. Xüsusilə ağır idman proqramlarına qoşula bilməyən, lakin gündəlik hərəkətini artırmaq istəyən şəxslər üçün praktik və rahat bir seçim kimi qiymətləndirilir.
Mənsumə
Sfera.az
