Beynin hərəkət və tarazlığı idarə edən hissəsi hesab olunan beyincik eyni zamanda dil bacarıqları ilə də sıx əlaqəlidir.
Sfera.az xəbər verir ki, alimlərin araşdırmalarına əsasən, bu nahiyə oxuma, yazı və söz emalı proseslərində aktiv şəkildə iştirak edir. Tədqiqat zamanı 33 yetkin iştirakçı müxtəlif yazı və söz emalı tapşırıqlarını yerinə yetirərkən onların beyin fəaliyyəti xüsusi skan üsulları ilə izlənilib.
Araşdırmaçılar xüsusilə səsə əsaslanan və yaddaşdan istifadə edilən yazı tapşırıqları zamanı beynin müxtəlif bölgələri arasındakı əlaqələri təhlil ediblər. Əldə olunan nəticələr göstərib ki, beyincik dil emalında iştirak edən digər beyin nahiyələri ilə güclü sinxron fəaliyyət göstərir. Bu isə həmin bölgənin yalnız motor funksiyalarına deyil, həm də dil və yazı bacarıqlarına təsir etdiyini ortaya qoyur.
Araşdırmanın maraqlı tərəflərindən biri də disleksiya – yəni oxuma çətinliyi yaşayan insanlarda müşahidə edilən nəticələr olub. Alimlər bu şəxslərdə də beyinciklə dil mərkəzləri arasındakı əlaqə modellərinin oxşar olduğunu müəyyən ediblər.
Bu tapıntılar beyinciyin dil bacarıqlarında əsas rol oynadığını göstərməklə yanaşı, öyrənmə çətinliklərinin səbəblərinin daha yaxşı anlaşılmasına kömək edə bilər. Eyni zamanda, gələcəkdə bu beyin şəbəkələrini gücləndirməyə yönəlmiş xüsusi təlim və terapiya üsullarının hazırlanması da mümkün görünür.
Fidan Hacızadə Sfera.az
