Məşhur texnologiya kanalı olan PhoneBuff 2026-cı ilin flaqman smartfonları arasında genişmiqyaslı sürət müqayisəsi aparıb.
Testlərin nəticələrinə əsasən, Samsung Galaxy S26 Ultra rəqiblərini geridə qoyaraq ilin ən sürətli smartfonu adını qazanıb.
Sfera.az xəbər verir ki, müqayisədə bazarın ən güclü cihazları hesab olunan iPhone 17 Pro Max, Google Pixel 10 Pro XL, OnePlus 15, Oppo Find X9 Pro və Vivo X300 Ultra da yer alıb. Testlər zamanı tətbiqlərin açılması, proqramlar arasında keçid və internetdə gəzinmə kimi gündəlik əməliyyatlarda cihazlar arasında ciddi fərq müşahidə edilməyib.
Əksər hallarda nəticələr arasındakı fərq bir saniyədən də az olub. Lakin resurs tələb edən proqramlar və süni intellekt əsaslı tapşırıqlar işə düşdükdə fərqlər daha qabarıq şəkildə üzə çıxıb. Xüsusilə Google Pixel 10 Pro XL zəif nəticə göstərərək liderdən 30 faizdən çox geri qalıb. Sınaqların qalibi olan Samsung Galaxy S26 Ultra ağır iş yükləri altında ən stabil və balanslı performans nümayiş etdirib. Bu üstünlük ona ümumi sıralamada birinci yeri qazandırıb. İkinci yerdə Vivo X300 Ultra qərarlaşıb. iPhone 17 Pro Max, OnePlus 15 və Oppo Find X9 Pro isə bir-birinə çox yaxın nəticələr göstərərək sıralamada demək olar ki, eyni səviyyədə yer alıblar.
Ekspertlər qeyd edirlər ki, müasir flaqman smartfonlar arasında gündəlik istifadə zamanı performans fərqlərini hiss etmək çətindir. Buna baxmayaraq, süni intellekt əməliyyatları və yüksək güc tələb edən tətbiqlər cihazların real imkanlarını üzə çıxarır. Bu baxımdan Samsung-un yeni flaqmanı 2026-cı ilin ən güclü smartfonu kimi diqqət çəkib.
Firuzə Əliyeva
Sfera.az
