Hər il aprelin 8-i dünyada Beynəlxalq Qaraçılar Günü kimi qeyd olunur.
Sfera.az xəbər verir ki, bu tarix 1971-ci ildə Londonda keçirilən Birinci Ümumdünya Qaraçılar Konqresinin şərəfinə təsis edilib.
Həmin konqresdə qaraçılar ilk dəfə özlərini vahid bir millət kimi dünyaya bəyan edərək, mavi və yaşıl rənglərdən ibarət, üzərində hərəkəti simvolizə edən qırmızı təkər təsviri olan milli bayraqlarını və himnlərini təsdiqləyiblər.
Dünyanın müxtəlif nöqtələrinə səpələnmiş 12 milyondan çox qaraçını birləşdirən bu gün həm onların zəngin mədəniyyətini təbliğ etmək, həm də üzləşdikləri sosial çətinliklərə diqqət çəkmək məqsədi daşıyır.
Genetik və linqvistik araşdırmalar göstərir ki, bu sirli xalqın kökləri təxminən min il əvvəl Hindistanın şimal-qərb bölgələrindən başlayan böyük köçə dayanır. Orta əsrlərdən etibarən Avropaya və Asiyaya yayılan qaraçılar, getdikləri hər yerə özünəməxsus musiqilərini, rəqslərini və folklorlarını aparıblar. Məsələn, bu gün dünya mədəniyyətinin incisi hesab olunan flamenko rəqsinin yaranmasında İspaniya qaraçılarının rolu danılmazdır. Maraqlıdır ki, tarixin axarında Pablo Pikasso, Çarli Çaplin və Yul Brinner kimi dünyaşöhrətli simalar da məhz qaraçı köklərinə sahib olublar.
Azərbaycanda da qaraçılar əsrlərdir cəmiyyətin bir parçası olaraq dinc şəkildə məskunlaşıblar. Əsasən Yevlax, Ağdaş, Şamaxı və Balakən kimi bölgələrdə yaşayan bu icmalar yerli adət-ənənələrlə öz mədəniyyətlərini sintez edərək özünəməxsus həyat tərzi formalaşdırıblar.
Bu gün qaraçıların hüquqlarının qorunması və onların cəmiyyətə inteqrasiyası beynəlxalq miqyasda mühüm humanitar məsələlərdən biri kimi aktuallığını qoruyur.
Bəsti Rəfizadə
Sfera.az
