Yaponiyanın Mie Universiteti alimləri genetika elmində böyük dönüş nöqtəsi hesab edilən mühüm bir kəşfə imza atıblar.
Sfera.az-ın məlumatına görə, aparılan uğurlu araşdırmalar nəticəsində Daun sindromunun əsas səbəbi olan əlavə xromosomun hüceyrələrdən çıxarılması mümkün olub.
Doktor Ryotaro Haşizumenin rəhbərlik etdiyi tədqiqat qrupu müasir “CRISPR-Cas9” texnologiyasından istifadə edərək insan genomundakı 21-ci xromosomu hədəf alıblar. Laboratoriya şəraitində həyata keçirilən təcrübə zamanı artıq xromosomun (trisomiya) kənarlaşdırılması hüceyrələrin normal fəaliyyətinin bərpa olunması ilə nəticələnib. Eksperimentin gedişində xüsusilə sinir toxumalarında müsbət dəyişikliklər müşahidə edilib ki, bu da beyin funksiyalarının yaxşılaşması istiqamətində böyük ümidlər yaradır.
Bununla belə, mütəxəssislər bu inqilabi metodun hələ ilkin mərhələdə olduğunu vurğulayırlar. Genetik redaktə zamanı sağlam xromosomların zədələnmə riski hələ də aktualdır. Texnologiyanın praktik olaraq tibbdə tətbiqi üçün daha geniş araşdırmalara, təhlükəsizlik sınaqlarına və əlavə testlərə ehtiyac duyulur. Bu kəşf Daun sindromunun sadəcə simptomlarını yox, birbaşa kökünü hədəf alan ilk uğurlu elmi addım kimi qiymətləndirilir. Lakin metodun real müalicə vasitəsi kimi insanlarda tətbiq olunması üçün hələ uzun bir zaman tələb olunur.
Fidan Hacızadə
Sfera.az
