Apple şirkəti foto çəkilişini inkişaf etdirmək üçün süni intellekti aktiv şəkildə sınaqdan keçirir.
Ən önəmli layihələrdən biri DarkDiff adlı neyron şəbəkəsidir. Bu sistem gecə çəkilişlərində şəkillərin səs-küyünü azaldır, detalları qoruyur və keyfiyyət itkisinin minimuma endirilməsinə xidmət edir.
Sfera.az xəbər verir ki, bu barədə 9to5Mac nəşri yazıb.
Ənənəvi həllərdən fərqli olaraq, DarkDiff hazır şəkli emal etmir; əksinə, səs-küylü sahələrlə birbaşa kadrın saxlanılması prosesində işləyir. Alqoritm açıq Stable Diffusion V2-1 modelinə əsaslanır.
Hazırda layihə erkən eksperimental mərhələdədir. DarkDiff mobil cihazlarda fon rejimində işləmək üçün hələ çox resurs tələb edir və qeyri-latin simvollarını lövhələrdə və ya mətndə düzgün tanımır, bu da artefaktlara səbəb ola bilər.
Eyni zamanda Apple öz CMOS sensoru üzərində də gizli iş aparır; sensor analoq səs-küy azaldıcı ilə birləşdirilib və gələcək iPhone modelləri üçün sınaqdan keçirilir.
Bu texnologiyaların kütləvi məhsullara tətbiqi isə bir neçə il çəkə bilər.
