Avropada Milad bayramı adətən dekabrın sonlarında qeyd olunsa da, Böyük Britaniyanın ən təcrid olunmuş adalarından biri olan Fula öz fərqli təqvimi ilə seçilir. Şotlandiyanın qərb sahilindən 32 kilometr aralıda yerləşən bu kiçik ada Miladı 6 yanvarda qeyd edir.
Sfera.az xəbər verir ki, Böyük Britaniya 1752-ci ildə Qriqoryan təqviminə keçsə də, Fula sakinləri köhnə Yulian təqvimindən istifadə etməyə davam ediblər. Bu səbəbdən Milad və Yeni il burada digər yerlərə nisbətən 12 gün gec qeyd olunur.
Cəmi 35 nəfərin yaşadığı Fula adası ölkənin ən ucqar yaşayış məntəqələrindən biri hesab olunur. Adada nə pab, nə mağaza, nə də Wi-Fi var. Ərzaq və digər ehtiyaclar yalnız hava şəraiti imkan verərsə, qayıq və ya kiçik təyyarə ilə gətirilir.
Təxminən səkkiz kvadrat kilometr ərazini əhatə edən adada Britaniyanın ən hündür dəniz qayalarından biri olan Da Kame yerləşir. Fula həm də Qütb İşıqlarını izləmək üçün ən əlverişli yerlərdən biridir – bu təbii fenomen oktyabrın ortalarından martın ortalarına qədər görünə bilər.
Adanın vəhşi təbiəti də diqqətçəkicidir. Fula özünəməxsus yerli qoyun növü ilə tanınır. Sahillərində bir neçə gəmi qəzası baş verib, o cümlədən 1899-cu ildə suya buraxılan və Birinci Dünya Müharibəsində istifadə edilən “RMS Oceanic” gəmisinin qalıqları burada yerləşir. Bu səbəbdən ada dalğıçlar üçün də maraqlı məkandır.
Adaya həftədə üç dəfə bərə ilə və ya təyyarə ilə getmək mümkündür. Səyahət təxminən iki saat çəkir. Ziyarətçilər adada öz yeməklərini və avadanlıqlarını gətirməli, qalmaq üçün isə özünü təmin edən yerlərdən istifadə etməlidirlər.
Aynil
