Dünyada minlərlə heyvan növü yox olmaq təhlükəsi ilə üz-üzədir.
Sfera.az xəbər verir ki, Beynəlxalq Təbiəti Qoruma İttifaqının (IUCN) məlumatına görə, hazırda 47 mindən çox heyvan və bitki növü nəsli tükənmək riski altındadır. Alimlər bu prosesi əsasən insan fəaliyyəti ilə əlaqələndirirlər.
Araşdırmalara əsasən, yaşayış mühitinin məhv edilməsi, iqlim dəyişikliyi, qanunsuz ovçuluq və ticarət heyvan populyasiyalarının sürətlə azalmasına səbəb olur. Xüsusilə meşələrin qırılması və qlobal istiləşmə bir çox nadir növ üçün geri dönüşü olmayan nəticələr yaradır.
Nəsli tükənməkdə olan heyvanlar arasında panqolin, Amur bəbiri, Afrika meşə fili, Sumatra oranqutanı və dağ qorillası kimi növlər yer alır. Bildirirlər ki, panqolinlər dünyada ən çox qaçaq yollarla satılan məməlilərdən biridir və bu səbəbdən onların sayı kritik həddə enib.
Araşdırmada qeyd olunur ki, Avstraliyada baş verən genişmiqyaslı meşə yanğınları koala populyasiyasına ciddi zərbə vurub. Bəzi bölgələrdə bu heyvanların nəsli artıq təhlükə altında hesab olunur.
Qeyd olunub ki, mövcud vəziyyət dəyişməzsə, yaxın onilliklərdə bir çox heyvan növü Yer üzündən tamamilə yox ola bilər. Bu isə ekosistemin tarazlığına ciddi təhlükə yaradır.
Fidan Hacızadə
Sfera.az
