Elə bilin yenə də Qacarın mühasirəsindəsiniz – ŞEİR

Tanınmış şair-yazıçı Həmid Herisçi Şuşada keçirilən Vaqif poeziya günlərinə şeir həsr edib.

Onun yeni yazıb “Yeni Sabah”ın redaksiyasına təqdim etdiyi şeiri biz də öz növbəmizdə oxucularımıza təqdim edirik:

XUDAFƏRİN Sezar pizza

( ŞUŞA VAQİF POEZİYA GÜNLƏRİNƏ)

Bir gün görüşərik Xudafərində,

İndi yellər əsir onun yerində...

Bir gün Xudafərinə oxşar körpünü

Gördüm,

Stiven Spilberqin “Casus körpüsü” filmində.

1961-ci ildə

Casusları dəyişirdilər o cür körpülər üzərində.

O filmdə, o dövrdə, o körpü üstə

Siqaretlər, öskürdürdü,

Qapılar, ürəklər eyni vaxtda döyünürdü,

Camadanlar, çox tez andıra, sovxaya dönürdü

O səhnələrin təsirindəndi

İlk kosmopolit fikirlərim

Elə bil alışdığım geyim ölçüsü “L”i

“M”lə əvəzlədim.

O filmlərdəydi dodaqlarını isladacaq

gözəllərim.

Bağışla, Münsiflər heyəti

Kəsildi internetim...

Xudafərin,

Sən o soyuq muharibənin,

Atam Qafar  Kəndlinin,

Karl Spilberqin,

Təkcə

Casus, tale körpüsü

                                        deyildin.

Sən belə yerlərdə öz addımlarını

Yalnız ortopedik çəkmələrə,

Birdə atam kimi rəhmətliklərə

Etibar edirdin.

Səndin

                            Siratül müstəqim

Körpülərin bioqrafiyası qısadı.

Siftəsi, tacirlərindi.

Əsgərlərindi. Mühacirlərindi.

Körpülər, axırlarına yaxın, şairlərindi.

Şəhriyarın,

                     Söhrab Tahirin.

Mənzərəni, deyən,

                              çox mürəkkəbləşdirdim?

Sadələşdirim:

Üzərində heç olmasa casusları dəyişin.

Təki o körpü

                            İşləsin.

Lap deyirsiz bəsitləşdirim:

Festival keçir Təbrizsiz. Xudafərinsiz

Herisçisiz.

Heç dəyişmədiz.

Yaxşı.

Elə bilin yenə də Şuşada

Ağa Məhəmməd şah Qacar

                                                        mü-ha-sirəsin-də-siniz.