Rusiya Müdafiə Nazirliyi “Oreşnik” mobil yerüstü raket sisteminin Avropadakı əsas müttəfiqi olan Belarus ərazisində rəsmi olaraq döyüş növbəsinə başladığını açıqlayıb.
Sfera.az xəbər verir ki, nazirliyin məlumatına görə, Belarus Respublikasında “Oreşnik” raket sistemi ilə təchiz olunmuş hərbi bölmənin döyüş növbəsinə başlaması münasibətilə rəsmi mərasim keçirilib. Tədbir zamanı Raket Qoşunları və Artilleriya Birliyinin (RVSN) bayrağı qaldırılıb və növbə dəyişiklikləri tam şəkildə başa çatdırılıb. Açıqlamada bildirilib ki, raketlərin buraxılışı, rabitə, mühafizə və enerji təminatı üzrə vəzifələri icra edən döyüş heyəti, eləcə də raket sistemi texnikasının mexanik-sürücüləri döyüş növbəsinə başlamazdan əvvəl müasir təlim və simulyasiya vasitələri ilə yenidən hazırlıq keçiblər.
Rusiya Müdafiə Nazirliyi qeyd edib ki, Belarus ərazisində Rusiya hərbçilərinin döyüş növbəsi çəkməsi və yaşayış şəraitinin təmin olunması üçün əvvəlcədən bütün zəruri şərait yaradılıb. Hazırda bölmənin şəxsi heyəti yeni döyüş patrul vəzifələrinin icra olunacağı ərazilərlə tanış olur.
Qeyd edək ki, bu addım Rusiyanın Ukrayna ilə sülh danışıqlarını davam etdirdiyi bir dövrdə atılması ilə diqqət çəkir və ekspertlər tərəfindən Avropa ölkələrinə yönəlik siyasi-hərbi mesaj kimi qiymətləndirilib.
Bəsti Rəfizadə
Sfera.az
