Yaponiyanın Amami-Oşima adası yaxınlığında dəniz dibində aşkarlanan sirli qum dairələrinin yaranma səbəbi illər sonra aydınlaşıb.
Sfera.az bildirir ki, alimlər müəyyən ediblər ki, bu həndəsi cəhətdən mükəmməl strukturları kiçik erkək pufferbalıqları yaradır.
1995-ci ildə kəşf edilən və diametri iki metrə çatan dairələr dişiləri cəlb etmək və yumurtalar üçün təhlükəsiz mühit yaratmaq məqsədi daşıyır. Təxminən 10 sm uzunluğunda olan erkək balıqlar üzgəclərindən istifadə edərək qumu qazır, mərkəzdən kənara doğru simmetrik yivlər və silsilələr formalaşdırırlar.
Araşdırmalar göstərir ki, dişilər ən səliqəli və incə qumla zəngin olan dairələri seçir. Tikinti prosesi 7–9 gün çəkir, yumurtlamadan sonra isə erkəklər bir müddət yumurtalara qulluq edir və daha sonra ərazini tərk edirlər.
Beləliklə, uzun illər sirr olaraq qalan sualtı “əkin dairələri”nin əslində balıqların romantik cütləşmə rituallarının bir hissəsi olduğu ortaya çıxıb.
Aynil
