Azərbaycan Respublikasının müstəqillik əldə etməsindən sonra qarşıya qoyduğu əsas strateji hədəflərdən biri dünya birliyinə tamhüquqlu inteqrasiya, regional və qlobal miqyasda etibarlı tərəfdaş kimi tanınmaq olub. Bu istiqamətdə həyata keçirilən ardıcıl və balanslaşdırılmış xarici siyasət ölkənin beynəlxalq mövqelərinin möhkəmlənməsinə, siyasi, iqtisadi və humanitar sahələrdə əməkdaşlığın genişlənməsinə şərait yaradıb.
Sfera.az bildiri ki, Azərbaycanın dünya birliyinə inteqrasiyası ilk növbədə müstəqil dövlət kimi beynəlxalq hüququn subyekti statusunu möhkəmləndirməsi ilə başlayıb.
Ölkə qısa müddət ərzində Birləşmiş Millətlər Təşkilatı (BMT), Avropa Təhlükəsizlik və Əməkdaşlıq Təşkilatı (ATƏT), İslam Əməkdaşlıq Təşkilatı (İƏT), Qoşulmama Hərəkatı və digər nüfuzlu beynəlxalq qurumlara üzv olub. Bu üzvlük Azərbaycan üçün beynəlxalq qərarların qəbulunda iştirak etmək, milli maraqlarını qlobal platformalarda müdafiə etmək imkanı yaradıb.
Azərbaycan beynəlxalq hüququn norma və prinsiplərinə sadiqliyini daim bəyan edir, dövlətlərin suverenliyi və ərazi bütövlüyünün toxunulmazlığını əsas prinsip kimi qəbul edib. Bu yanaşma ölkənin beynəlxalq arenada etibarlı və proqnozlaşdırıla bilən tərəfdaş kimi qəbul olunmasına mühüm töhfə verib.
Azərbaycan yerləşdiyi geosiyasi mövqeyə görə region ölkələri ilə əməkdaşlığın inkişafına xüsusi önəm verib. Cənubi Qafqazda sülh, təhlükəsizlik və sabitliyin təmin olunması ölkənin xarici siyasətinin prioritet istiqamətlərindəndir. Türkiyə və Gürcüstanla strateji tərəfdaşlıq münasibətləri enerji, nəqliyyat və təhlükəsizlik sahələrində uğurlu regional layihələrin həyata keçirilməsinə imkan yaradıb.
Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars kimi beynəlxalq əhəmiyyətli layihələr Azərbaycanı regionun mühüm enerji və nəqliyyat mərkəzinə çevirib. Bu layihələr yalnız iqtisadi deyil, eyni zamanda siyasi inteqrasiyanın dərinləşməsinə xidmət edir, region ölkələri arasında qarşılıqlı asılılığı və etimadı artırıb.
Azərbaycan dünyanın aparıcı dövlətləri ilə ikitərəfli əlaqələrin inkişafına xüsusi diqqət yetirib. Avropa İttifaqı ölkələri ilə enerji təhlükəsizliyi, ticarət və nəqliyyat sahələrində əməkdaşlıq genişlənməkdədir. Cənub Qaz Dəhlizi layihəsi Avropanın enerji təhlükəsizliyində Azərbaycanın rolunu əhəmiyyətli dərəcədə artırıb.
Eyni zamanda ABŞ, Rusiya, Çin və digər böyük dövlətlərlə münasibətlər qarşılıqlı maraqlar və bərabərhüquqlu əməkdaşlıq prinsipləri əsasında qurulub. Azərbaycan balanslaşdırılmış xarici siyasət xətti yürüdərək müxtəlif güc mərkəzləri arasında tərəfdaşlıq münasibətlərini qoruyub saxlayır və bu da ölkənin beynəlxalq nüfuzunu gücləndirib.
Azərbaycan beynəlxalq təşkilatlarla əməkdaşlıqda fəal mövqe tutur. Xüsusilə BMT çərçivəsində sülhün qorunması, humanitar yardım, davamlı inkişaf və iqlim dəyişiklikləri ilə mübarizə sahələrində təşəbbüslərlə çıxış edib. Azərbaycanın Qoşulmama Hərəkatına sədrliyi dövründə (2019-2023) təşkilatın beynəlxalq arenadakı rolunun gücləndirilməsi, inkişaf etməkdə olan ölkələrin maraqlarının müdafiəsi istiqamətində mühüm addımlar atılıb.
Avropa Şurası, ATƏT və digər qurumlarla əməkdaşlıq isə hüquqi islahatların aparılması, insan hüquqlarının qorunması və demokratik institutların inkişafı sahələrində təcrübə mübadiləsinə şərait yaradır.
Azərbaycanın dünya birliyinə inteqrasiyasında humanitar və mədəni diplomatiya mühüm rol oynayıb. Bakıda keçirilən beynəlxalq forumlar, mədəniyyətlərarası dialoq tədbirləri, idman yarışları və qlobal konfranslar ölkənin açıq, tolerant və multikultural dəyərlərə əsaslanan dövlət kimi tanıdılmasına xidmət edib. Bu tədbirlər Azərbaycanın yumşaq güc potensialını artıraraq beynəlxalq əlaqələrin möhkəmlənməsinə töhfə verib.
Ümumilikdə, Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi ölkənin müstəqil və çoxşaxəli xarici siyasətinin əsas istiqamətlərindən biridir. Bu siyasət milli maraqların qorunması, regional sabitliyin təmin olunması və qlobal proseslərdə fəal iştirak baxımından mühüm əhəmiyyət daşıyıb. Azərbaycanın beynəlxalq aləmdə artan nüfuzu və təşəbbüskar mövqeyi gələcəkdə də əməkdaşlıq imkanlarının genişlənəcəyini və ölkənin dünya birliyində mövqeyinin daha da möhkəmlənəcəyini göstərib.
Bəsti Rəfizadə
Sfera.az
Mövzu: Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi
Qeyd: Yazı Medianın İnkişafı Agentliyinin maliyyə dəstəyi ilə hazırlanıb
