Fransa Senatı 15 yaşdan kiçik uşaqların sosial mediadan istifadəsini məhdudlaşdıran qanun layihəsini təsdiqləyib. Bu qanun layihəsi, Fransanın Milli Assambleyası tərəfindən qəbul edilmiş geniş qadağaya düzəliş edərək, uşaqların fiziki, zehni və mənəvi inkişafına zərər verə biləcek sosial media platformalarına girişin məhdudlaşdırılmasını nəzərdə tutur.
Sfera.az xəbər verir ki, Senatın açıqlamasında mütləq qadağanın Konstitusiya Şurası tərəfindən ləğv edilmə riski olduğu vurğulanıb.
Bu halda qanun praktik olaraq təsirsiz qala bilər. Senat, həmçinin öz düzəlişlərinin həm uşaqları qorumağa, həm də valideyn səlahiyyətlərinə hörmət göstərməyə daha balanslı bir yanaşma olduğunu bəyan edib.
Yeni qaydalara əsasən, Fransanın rəqəmsal rabitə tənzimləyicisi "Arcom" tərəfindən hazırlanan xüsusi siyahıdakı sosial media platformalarına 15 yaşdan kiçik uşaqların girişi qadağan ediləcək. Siyahıda olmayan digər platformalara isə yalnız valideynin razılığı ilə girmək mümkün olacaq.
Hökumət ümumi qadağaya qayıtmağı təklif edib, lakin Senat Avropa Komissiyasının qiymətləndirmələri əsasında müvafiq dəyişikliklərin ediləcəyini bildirərək, bu məsələnin birgə komitə tərəfindən müzakirə olunacağını qeyd edib. Kompromis əldə olunduğu təqdirdə qanun layihəsi hər iki palatanın səsverməsinə təqdim ediləcək.
Fransa hökuməti qanunun sentyabr ayında — yeni tədris ilinə yetişməsini və tətbiqini hədəfləyir. Qanun layihəsi ötən ilin noyabr ayında parlamentə təqdim edilib və 2026-cı ilin yanvar ayında Milli Assambleya tərəfindən qəbul edilib. Bu qanun yalnız sosial media platformalarına çıxışı məhdudlaşdırmaqla yanaşı, məktəblərdə mobil telefonların istifadəsini də əlavə qadağalarla tənzimləyir.
Mənsumə
Sfera.az
