İtaliya Yaxın Şərq siyasətində kəskin dönüş edərək İsrail ilə ənənəvi müttəfiqlik xəttindən uzaqlaşmağa başlayıb.
Sfera.az xəbər verir ki, ölkənin baş naziri Corcia Meloni BMT platformasında sərt çıxış edərək İsrailin son hərbi əməliyyatlarını kəskin tənqid edib və Avropa İttifaqının sanksiyalarına dəstək verildiyini açıqlayıb. Bu addım G7 ölkələri arasında sağçı lider tərəfindən İsrailə qarşı atılan ən sərt addımlardan biri kimi qiymətləndirilir.
Məlumata görə, Meloninin qeyd etdiyi “qırmızı xətt” mülki itkilərin çox olduğu son əməliyyatlarla bağlıdır. Roma artıq bu hadisələri “kütləvi qırğın” kimi qiymətləndirir ki, bu da əvvəlki “mütənasib müdafiə” ritorikasından ciddi fərqlənir. İtaliyanın dəstəklədiyi sanksiyaların ayrı-ayrı israilli nazirləri hədəf alacağı, həmçinin Avropa İttifaqı ilə İsrail arasında assosiasiya sazişinin qismən dayandırılmasının gündəmə gələ biləcəyi bildirilir. Bu isə İsrailin Avropa bazarına çıxışına ciddi təsir göstərə bilər.
Ekspertlər hesab edir ki, Meloni bu addımla həm vasitəçi rolunu qorumağa, həm də beynəlxalq təzyiqlər fonunda mövqeyini balanslaşdırmağa çalışır. Qeyd olunur ki, İtaliyanın bu qərarı digər Avropa ölkələri üçün də presedent yarada bilər.
Firuzə Əliyeva
Sfera.az
