İpoteka mübahisələri üzrə məhkəmə işlərində diqqət yetirilməli əsas məqamlar açıqlanıb.
Sfera.az xəbər verir ki, bu barədə Naxçıvan Ali Məhkəməsinin Kommersiya kollegiyasının sədri Səxavət Bəylərli məlumat verib.
Onun sözlərinə görə, ipoteka ilə bağlı mübahisələrdə ən vacib şərtlərdən biri ipoteka saxlayanın (iddiaçının) ipoteka qoyana əmlaka tutmanın yönəldilməsi barədə bildiriş təqdim etdiyini sübut etməsidir. Bu sübut məhkəməyə təqdim olunmalıdır.
Bəs bu nə deməkdir?
Sadə şəkildə izah olunarsa, əgər bank (yəni ipoteka saxlayan şəxs) borca görə sizin evinizi (əmlakınızı) əlinizdən almaq istəyirsə, o, mütləq sizə əvvəlcədən rəsmi xəbərdarlıq (bildiriş) göndərməlidir.
Məhkəmə deyir ki, bank birbaşa evi sata bilməz. Əvvəlcə yazılı bildiriş verməlidir ki, borc ödənilməsə, əmlakdan tutma tətbiq olunacaq.
Bank bunun üçün məhkəmədə sadəcə bildiriş yazdığını sübut etməməlidir. O, həm də bildiriş kağızının şəxsə çatdığını (məsələn, poçt qəbzi ilə) sübut etməlidir.
Əgər bank bu bildirişi rəsmi qaydada çatdırdığını sübut edə bilməsə, məhkəmədə uduza bilər və evi satmaq prosesi dayandırıla bilər.
S.Bəylərli bildirib ki, ipoteka predmetinə tutmanın yönəldilməsi barədə məhkəmə qərarında bir sıra mühüm məlumatlar öz əksini tapmalıdır.
Bunlara ilk növbədə, ipoteka predmetinin mühafizəsi və satışı ilə bağlı xərclər istisna olmaqla, həmin əmlakın dəyərindən ipoteka saxlayana ödəniləcək məbləğ daxildir. Bundan əlavə, qərarda ipoteka predmetinin ətraflı təsviri verilməlidir. Yəni, vətəndaşa məxsus mənzilin yerləşdiyi ünvan, sahəsi və digər vacib göstəricilər qeyd olunmalıdır.
Eyni zamanda ipoteka predmetinin bazar dəyəri də müəyyənləşdirilməlidir. Bu dəyər tərəflərin razılaşması əsasında və ya məhkəmə tərəfindən cəlb edilən qiymətləndirici təşkilat vasitəsilə təyin olunur.
Qeyd edilib ki, zərurət yarandığı hallarda ipoteka predmetinin satışınadək onun mühafizəsinin təmin olunması ilə bağlı tədbirlər də məhkəmə qərarında göstərilməlidir.
Firuzə Əliyeva
Sfera.az
