Qəhrəman olmaq üçün dünyanı dəyişdirməyə və ya qanlı müharibələrin qarşısını almağa ehtiyac yoxdur. Bir neçə həyata toxunmaq, bir neçə xoşbəxt anlar yaratmaq qəhrəman olmaq üçün kifayətdir. Buna görə də tarix böyük və ya kiçik, insanlara bu və ya digər şəkildə kömək edən adları və adları açıqlanmayan qəhrəmanlarla doludur. Avstraliyada yaşayan və 50 ildə 160 insanın intihar etməsinin qarşısını alan Don Riçi bu qəhrəmanlardan biridir. Həyatı boyunca ümidsizliyə qarşı dəyərli bir mübarizə aparan, onlarla insanın həyatını xilas edən və yüzlərlə insanın həyatını dəyişdirən bu qəhrəmanın silahı isə xeyirxahlıq və sadə bir söhbətdən başqa bir şey olmayıb.
Sfera.az bu ilhamverici qəhrəmanlıq hekayəsinin təfərrüatlarını təqdim edir.
Don Riçi 1926-cı ildə Avstraliyada anadan olub. 1939-cu ildə Kral Avstraliya Donanmasına qoşulan Riçi İkinci Dünya Müharibəsinin sonuna qədər cəbhə xəttində xidmət edib.
Müharibədən sonra o, Avstraliyaya qayıdıb, Sidneyin The Gap bölgəsində məskunlaşıb və sığorta agenti kimi həyatını davam etdirib.
Gap bölgəsi möhtəşəm okean mənzərələri, yüksək qayalıqları və təəssüf ki, intiharları ilə məşhurdur. Hər il onlarla insanın qayalıqlardan tullanaraq həyatlarına bu şəkildə son qoyduğu məlumdur.
Don Riçinin evi ərazidəki ən məşhur intihar yerlərindən birinin yaxınlığında yerləşir. Əslində, niyyətindən asılı olmayaraq, qayalıqlara getmək istəyən hər kəs Riçinin evinin yanından keçməlidir.
Uzun illər eyni ərazidə yaşayıb çoxsaylı intiharların şahidi olduğu üçün kimin okean mənzərəsindən zövq almağa, kimin isə qayalıqdan tullanmaq niyyəti ilə gəldiyini deyə bilirdi.
Buna görə də, "heç nə etmədən gözləmək" Riçi üçün deyildi. Məhz bu, ona onlarla insanın həyatını xilas etməyə imkan verib.
Don Riçi 50 il ərzində 160 insanın həyatını xilas edib. Ailəsinin sözlərinə görə, bu rəqəm daha çoxdur. Bəs bu adi insan necə belə bir möcüzə göstərə bildi?
Riçi intihar həddində olan insanlara son dərəcə mehribanlıqla yanaşaraq onları bir fincan qəhvə və söhbətə dəvət edirdi. Gündəlik və sadə mövzular ətrafında, mühakimə və ya ittihamdan uzaq olan söhbətlər onlarla insanın həyatını xilas edərək, saysız-hesabsız insanın həyatını dəyişdirib.
Mehribanlıqdan və səmimi söhbətdən silah kimi istifadə edərək bir həyat xilas etmək Riçi üçün bu qədər asan idi.
Lakin, Don Riçinin xoş təklifini rədd edən və ya onun "çata bilmədiyi" insanlar da var idi. Buna baxmayaraq, o, heç vaxt ümidsizliyə qarşı mübarizəsindən əl çəkməyib.
O, uzun illər həyatını xilas etdiyi bəzi insanlarla əlaqə saxlayıb. Təşəkkür məktubları və ya köhnə dostların ziyarətləri Riçinin həyatında adi hal idi.
Xilas etdiyi həyatlar Riçini yerli qəhrəmana çevirmişdi. O, həm Avstraliyada, həm də xaricdə çoxsaylı mükafatlar alıb. O, "Gap Mələyi" kimi tanındı.
"Gap Mələyi" 2012-ci ildə 86 yaşında vəfat edib.
Aynil
Sfera.az
