ABŞ Prezidenti Donald Trampın qida və içki vərdişləri ilə bağlı səsləndirilən iddialar yenidən gündəmə gəlib.
Sfera.az xəbər verir ki, ABŞ Federal Səhiyyə Xidmətlərinin direktoru Mehmet Oz Trampın pəhriz kola ilə bağlı maraqlı və qeyri-adi əsaslandırmalara inana bildiyini deyib.
Onun sözlərinə görə, Tramp sodanın xərçəng hüceyrələrini öldürə biləcəyi fikrini bəzən ciddi, bəzən isə yarızarafat şəkildə ifadə edib.
Mehmet Oz həmçinin "Air Force One" təyyarəsində Trampla görüşünü xatırladaraq prezidentin qazlı içkilərə xüsusi maraq göstərdiyini və bəzi hallarda onların tərkibi ilə bağlı özünəməxsus izahlar verdiyini qeyd edib. Onun sözlərinə görə, Tramp bu tip içkiləri bəzən sağlamlıq baxımından faydalı kimi təqdim edib.
Digər iddialara əsasən, Trampın "Fanta"nı və bəzi portağal dadlı içkiləri “təbii və təzə sıxılmış” kimi dəyərləndirdiyi də bildirilir. Bu yanaşma onun qida və içkilərin tərkibi barədə qeyri-standart düşüncələrə sahib olduğunu göstərən nümunə kimi təqdim edilir.
Donald Trampın oğlu isə atasının yüksək enerji və dözümlülüyünü vurğulayaraq onun yaşına baxmayaraq aktiv həyat tərzi sürdüyünü bildirib və bu davranışların tam mənfi qiymətləndirilməməsi gərəkdiyini qeyd edib.
Ümumilikdə, bu açıqlamalar ABŞ-da qidalanma vərdişləri və sağlamlıq mövzularının yenidən gündəmə gəldiyi bir dövrdə ortaya çıxıb. ABŞ Səhiyyə Nazirliyində aparılan müzakirələr də insanların daha çox təbii və qida dəyəri yüksək məhsullara yönəlməsinin vacibliyini ön plana çıxarır.
Trampın “fast food” və qazlı içkilərə olan marağı uzun müddətdir ictimaiyyətə məlumdur. Hətta onun əvvəlki prezidentlik dövründə pəhriz kola sifariş etmək üçün xüsusi düymə sistemindən istifadə etdiyi barədə iddialar da mövcuddur və bu, onun qeyri-adi qida vərdişlərini bir daha gündəmə gətirib.
Mənsumə
Sfera.az
