Çin hərbi məqsədlər üçün istifadə potensialı ilə diqqət çəkən və minlərlə metr dərinlikdəki sualtı infrastrukturu kəsmə qabiliyyətinə malik yeni nəsil cihazını 3 min 500 metr dərinlikdə uğurla sınaqdan keçirib.
Sfera.az xarici mediaya istinadən xəbər verir ki, Çin Təbii Sərvətlər Nazirliyinin məlumatına görə, "Haiyang Dizhi 2" tədqiqat gəmisi 2026-cı ilin ilk dərin dəniz elmi missiyasını tamamlayıb.
Səfər zamanı dənizaltı kabelləri və oxşar sualtı konstruksiyaları kəsmə gücünə malik olan elektro-hidrostatik aktuatorun sınağı 3 min 500 metr dərinlikdə icra edilib. Bu texnologiya həm mülki, həm də hərbi sahədə böyük strateji əhəmiyyət kəsb edir.
Elektro-hidrostatik aktuator (EHA) adlanan bu sistem hidravlik quruluşu, elektrik mühərrikini və idarəetmə blokunu yığcam bir cihazda birləşdirir. Bu isə xarici yağ borularına olan ehtiyacı aradan qaldıraraq cihazın yüksək təzyiq altında daha çevik və effektiv işləməsini təmin edir. Mütəxəssislərin fikrincə, bu texnologiya yalnız hərbi sahədə deyil, həm də dərin dəniz neft və qaz boru kəmərlərinin tikintisi və ya təmirində aktiv şəkildə istifadə olunacaq.
Bəsti Rəfizadə
Sfera.az
