Pilləkənlərlə qalxmaq gündəlik həyatın adi bir hərəkəti kimi görünsə də, orqanizmin ümumi fiziki vəziyyətini qiymətləndirmək üçün olduqca faydalı bir göstəricidir. Bu hərəkət zamanı ürək, ağciyər və əzələlər sinxron şəkildə çalışdığı üçün bədənin dözümlülüyü barədə ilkin məlumat əldə etmək mümkündür.
Sfera.az xəbər verir ki, mütəxəssislərin fikrincə, bu sadə üsul heç bir xüsusi avadanlıq tələb etmədən insanın fiziki hazırlıq səviyyəsini müəyyən etməyə imkan verir.
Yaşayış binalarındakı pilləkənlər də rahatlıqla “özünü yoxlama” vasitəsi kimi istifadə oluna bilər. Bunun üçün 10–12 pillədən ibarət bir pilləkən sahəsini normal tempdə, qaçmadan və tələsmədən qalxmaq kifayətdir. Bu proses zamanı nəfəsin necə dəyişdiyinə diqqət yetirmək ən vacib məqamdır.
Testin nəticələri insanın fiziki durumu haqqında aydın mənzərə yaradır. Pilləkənləri rahatlıqla qalxıb, eyni zamanda danışmağı bacaran şəxslər yaxşı formada hesab olunur. Yüngül nəfəs artımı fiziki hazırlığın orta səviyyədə olduğunu, güclü nəfəs darlığı isə hazırlığın zəifliyini göstərir. Əgər hərəkət zamanı sinə ağrısı və ya başgicəllənmə baş verərsə, test dərhal dayandırılmalı və mütləq həkimə müraciət edilməlidir.
Araşdırmalar göstərir ki, pilləkən qalxmaq qabiliyyətinin aşağı olması ürək-damar xəstəlikləri riski ilə birbaşa əlaqəli ola bilər. Buna görə də bu sadə hərəkət həm diaqnostik test, həm də olduqca faydalı gündəlik məşq növü kimi qəbul edilir. Mütəxəssislər gündəlik həyatda lift əvəzinə pilləkənlərdən daha çox istifadə etməyi və ayaq əzələlərini gücləndirən hərəkətləri artırmağı tövsiyə edirlər.
Mənsumə
Sfera.az
