Faizlə borc vermək ilk baxışda asan görünsə də, prosedur düzgün aparılmadıqda ciddi problemlərə səbəb ola bilər.
Buna görə borc verməzdən əvvəl bəzi vacib qaydaları bilmək lazımdır.
Sfera.az xəbər verir ki, Azərbaycan qanunvericiliyinə görə, borc verən şəxs borcalandan əvvəlcədən razılaşdırılmış faiz tələb edə bilər. Yəni faizlə borc vermək qanunla qadağan deyil. Ancaq əsas məsələ bu münasibətlərin necə rəsmiləşdirilməsidir. Praktikada insanlar çox vaxt borcu qeyri-rəsmi şəkildə verir, ya ümumiyyətlə müqavilə olmur, ya da əsas şərtlər dəqiq yazılmır. Bu isə sonradan mübahisə yarananda sübut etməyi çətinləşdirir. Digər problem isə ödənişlərin sənədsiz, nağd şəkildə aparılmasıdır. Pulun verilməsi və qaytarılması mütləq sənədlə təsdiqlənməlidir ki, hər iki tərəf öz hüquqlarını qoruya bilsin.
Bundan başqa, əgər bir şəxs davamlı olaraq faizlə borc verirsə, bu artıq sahibkarlıq fəaliyyəti sayılır və rəsmi qeydiyyatdan keçməlidir. Əks halda, bu, qanunsuz fəaliyyət kimi qiymətləndirilə bilər. Məhkəmə təcrübəsində də belə hallar olub: qaydalar pozulduqda materiallar prokurorluğa göndərilir və hüquqi məsuliyyət yarana bilər. Problemlərin qarşısını almaq üçün əsas qaydalar bunlardır:
– borcu mütləq yazılı müqavilə ilə rəsmiləşdirin; – məbləğ, faiz, müddət və qaytarılma şərtlərini aydın yazın;
– ödənişləri mümkün qədər bank vasitəsilə edin və sənədləşdirin;
– bu işi tez-tez görürsünüzsə, rəsmi qeydiyyatdan keçin.
Nəticə olaraq, faizlə borc vermək mümkündür, amma qaydalara əməl olunmasa, həm pul itirmək, həm də hüquqi problem yaşamaq riski var. Buna görə diqqətli olmaq və lazım gəlsə hüquqşünasdan məsləhət almaq vacibdir.
Firuzə Əliyeva
Sfera.az
