Astronavtlar "Ulduz müharibələri" (Star Wars) filminin əfsanəvi qəhrəmanı Lyuk Skayvolkerin vətəni olan "Tatuin" planetinə bənzər, iki ulduz ətrafında dövr edən 27 yeni potensial planet aşkar ediblər.
Sfera.az xəbər verir ki, bu möhtəşəm kəşf haqqında hesabat dünya miqyasında "Ulduz müharibələri günü" kimi qeyd olunan 4 may tarixində ictimaiyyətə təqdim edilib.
Alimlər bu araşdırma zamanı "apsidal irəliləmə" (orbitin pretsessiyası) adlanan xüsusi analiz metodundan istifadə ediblər. Bu üsul vasitəsilə bir-birinin ətrafında fırlanan və qarşılıqlı tutulmalar yaradan qoşa ulduzlar arasındakı qravitasiya rəqsləri dərindən təhlil edilib.
Tədqiqat prosesində NASA-nın TESS (Tranzit Ekzoplanet Sorğu Peyki) missiyasından əldə olunan geniş məlumat bazası əsas götürülüb. Nəticədə, eynilə məşhur filmdəki kimi iki günəşi olan 27 yeni planet namizədi müəyyən edilib.Tədqiqatın nəticələrinə əsasən, bu göy cisimləri haqqında bəzi mühüm faktlar məlum olub. Belə ki, sözügedən planetlər Yerdən təxminən 650 ilə 18 min işıq ili məsafəsində yerləşir. Bu planetlərin ölçülərinin Neptunla müqayisə oluna biləcək həcmdən Yupiterin ölçüsündən 10 dəfə böyük olan nəhəng ölçülərə qədər dəyişdiyi təxmin edilir. Araşdırmanın elmi nəticələri nüfuzlu "Monthly Notices of the Royal Astronomical Society" jurnalında dərc olunaraq elmi ictimaiyyətə təqdim edilib.Bu kəşf kainatdakı planet sistemlərinin düşündüyümüzdən daha mürəkkəb və rəngarəng olduğunu bir daha sübut edir. Görünən odur ki, fantastik filmlərdəki cəsarətli ssenarilər artıq yavaş-yavaş real elmi faktlara çevrilməkdədir.
Bəsti Rəfizadə
Sfera.az
