Səyahət zamanı alış-veriş həvəskarları üçün bəzi ölkələrdə qiymətlər nisbətən daha əlverişli olur və brend çeşidi çox zəngindir.
Ən yaxşı “iPhone”, ayaqqabı və geyimlər, kosmetika və vitamin əlavələri haradan almaq sərfəlidir?
Sfera.az oxucularına bəzi ölkələr üzrə tövsiyələrini təqdim edir.
Kosmetika və texnologiyanın ideal ünvanı – Yaponiya
Yaponiya səyahətçilər üçün alış-veriş cənnətidir. Mağazaların əksəriyyəti rüsumsuz alış-veriş imkanı təqdim etdiyi üçün boş çamadanla getmək tövsiyə olunur. Don Quijote mağazasında American Tourister və Samsonite çamadanları bəzi ölkələrə nisbətən üçdə bir qiymətinə satılır. Kosmetika, vitaminlər, düyü maskaları, “KitKat” və matcha çayı geniş çeşiddə təqdim olunur. On və Hoka idman brendləri 30-40% ucuz, New Balance və Uggs isə təxminən yarı qiymətinədir. Sadə geyimlər üçün Uniqlo, elektronika üçün Bic Camera, gündəlik və ev əşyaları üçün isə Muji və Daiso ideal seçimdir.
Vitaminlər və geyim alış-verişi – ABŞ
Amerikaya səfər edənlər Whole Foods və CVS Pharmacy-dən vitamin və kollagen əlavələri, TJ Maxx və Marshalls mağazalarından məşhur brendlərin geyim və çantalarını dörddə bir qiymətinə ala bilərlər. Trader Joe’s mağazalarından kolleksiya dəyəri olan ucuz kətan çantalar tapmaq mümkündür. New York yaxınlığındakı Woodbury Premium Outlet-də Columbia, The North Face, Helly Hansen və Ralph Lauren kimi brendləri bəzi ölkələrə nisbətən dörddə bir qiymətinə almaq mümkündür. GAP və Disney Store isə uşaqlar üçün ideal alış-veriş yerləridir.
Premium outlet və dizayner brendləri – Avropa
Avropadakı satış mərkəzləri ABŞ qədər endirimli olmasa da bəzi ölkələrlə müqayisədə qiymətlər yarıdan üçdə birə qədər ucuz olur. Almaniyanın Metzingen şəhərində premium və lüks brendlərin mağazaları yerləşir. DM və Müller şəbəkələrindən kosmetika, üzvi və şəxsi qulluq məhsulları əldə etmək mümkündür.
Telefon alış-verişi üçün ən yaxşı ölkələr
Mobil telefon alış-verişi üçün də Yaponiya sərfəlidir. Məsələn, “iPhone 17 Pro Max” modeli bəzi ölkələrə nisbətən ikiqat ucuzdur. Qeydiyyat haqqı əlavə olunsa da yenə də sərfəlidir. Göründüyü kimi, Yaponiya, ABŞ və Avropa səyahətçilər üçün alış-verişdə fərqli üstünlüklər təqdim edir. Yaponiya kosmetika və texnologiyada, ABŞ vitaminlər və geyimdə, Avropa isə premium brendlərdə endirimlərdə önə çıxır. Məhsul çeşidinə diqqət yetirmək və alış-verişi planlı etmək həm sərfəli, həm də zövqlü təcrübə qazandırır.
Mənsumə
Sfera.az
