İngiltərənin “Aston Villa” və Almaniyanın “Frayburq” komandaları UEFA Avropa Liqasının finalına vəsiqə qazanıblar.
Sfera.az xəbər verir ki, yarımfinal mərhələsində “Aston Villa” İngiltərənin “Nottingem Forest” komandası ilə üz-üzə gəlib. İlk oyunda səfərdə 0:1 hesabı ilə məğlub olan Birmingem təmsilçisi cavab qarşılaşmasında rəqibini 4 cavabsız qolla darmadağın edərək finala yüksəlib. “Frayburq” isə yarımfinalda Portuqaliyanın “Braqa” komandası ilə qarşılaşıb. Almaniya klubu ilk görüşdə səfərdə 1:2 hesabı ilə uduzsa da, doğma meydanda keçirilən cavab matçında 3:1 hesablı qələbə qazanaraq finala adlayıb.
Qeyd edək ki, əvvəlcə İngiltərənin “Kristal Palas” klubunun Avropa Liqasında çıxış etməsi planlaşdırılırdı. Klub buna FA Kubokundakı qələbəsi sayəsində nail olmuşdu. Lakin UEFA 1 mart 2025-ci il tarixindən etibarən bir neçə klubun mülkiyyət meyarlarının turnir qaydalarına zidd şəkildə pozulduğunu açıqlayıb. “Kristal Palas” və Fransanın “Lion” klubları həmin dövrdə amerikalı iş adamı Con Tekstora məxsus idi. İyun ayında Con Tekstor Fransa klubunun rəhbərliyindən ayrılsa da, UEFA Fransa çempionatını altıncı pillədə başa vuran “Lion”un Avropa Liqasında iştirakına icazə verib.
Bunun nəticəsində İngiltərə Premyer Liqasında yeddinci yeri tutan və Konfrans Liqasına vəsiqə qazanan “Nottingem Forest” Avropa Liqasına yüksəlib. Bu final “Aston Villa”nın baş məşqçisi Unay Emeri üçün altıncı Avropa Liqası finalı olacaq. İspaniyalı mütəxəssis daha əvvəl “Sevilya” ilə 2014, 2015 və 2016-cı illərdə, “Vilyarreal”la isə 2021-ci ildə turnirin qalibi olub. O, həmçinin 2019-cu ildə “Arsenal”la final oynasa da, həlledici görüşdə “Çelsi”yə 1:4 hesabı ilə məğlub olub. UEFA Avropa Liqasının final görüşü mayın 20-də İstanbulda keçiriləcək. Qarşılaşmaya “Beşiktaş” klubunun ev stadionu ev sahibliyi edəcək. Xatırladaq ki, UEFA Avropa Liqası Avropanın nüfuzuna görə ikinci ən böyük klub turniri hesab olunur. Turnirin son qalibi İngiltərənin “Tottenhem Hotspur” komandasıdır. Yarışın tarixində ən çox, 7 dəfə çempion olan klub isə İspaniyanın “Sevilya” komandasıdır.
Niyaz Hacıyev
Sfera.az
