Dünyada orta “IQ” səviyyəsinə görə ən yüksək nəticə göstərən ölkələrin siyahısı açıqlanıb.
Sfera.az xəbər verir ki, araşdırmalara əsasən, Şərqi Asiya ölkələri həm zəka göstəricilərində, həm də akademik uğurlarda qlobal liderliyini qoruyur.
Məlumata görə, Dünya Əhali İcmalının hesabatında Çin, Tayvan, Honkonq və Makao 107 orta IQ balı ilə ilk sırada yer alıb. Siyahıda onları 106 balla Cənubi Koreya və Yaponiya izləyir.
Araşdırmanın nəticələri dünya üzrə 1,3 milyondan çox insanın iştirak etdiyi Beynəlxalq “IQ” Testinin (IIT) məlumatlarına əsaslanır. Bu göstəricilər indiyədək aparılmış ən genişmiqyaslı qlobal müqayisələrdən biri hesab olunur. Tədqiqatçılar Riçard Linn və Devid Bekkerin əvvəlki araşdırmaları da Şərqi Asiya ölkələrinin yüksək nəticələrini təsdiqləyib. Mütəxəssislər hesab edir ki, bu göstəricilər təhsil sistemi və akademik nailiyyətlərlə sıx əlaqəlidir.
Belə ki, “OECD”nin 2022-ci il üzrə Beynəlxalq Tələbə Qiymətləndirmə Proqramında (PISA) Sinqapur ümumi nəticələrə görə birinci olub. Şagirdlər riyaziyyat, elm və oxu bacarıqları üzrə yüksək nəticələr nümayiş etdiriblər. Çin, Yaponiya, Tayvan və Cənubi Koreya da ilk beşlikdə qərarlaşıb. Bununla yanaşı, ekspertlər “IQ” göstəricisinin zəkanın yeganə ölçüsü olmadığını vurğulayırlar. Təhsilin keyfiyyəti, innovasiya potensialı və Nobel mükafatları kimi faktorları nəzərə alan Kəşfiyyat Kapitalı İndeksi (ICI) fərqli nəticələr ortaya qoyur.
2017-ci ildə ABŞ bu indeksdə birinci yerdə qərarlaşıb. Çin və Rusiya da ilk onluqda yer alıb. Hindistan, Braziliya və İndoneziya kimi ölkələrin də reytinqə daxil olması intellektual potensialın müxtəlif aspektlərlə qiymətləndirildiyini göstərir. Analitiklər bildirirlər ki, aşağı “IQ” göstəriciləri bir çox hallarda fitri qabiliyyətdən daha çox təhsil imkanları və sosial-iqtisadi bərabərsizliklərlə bağlıdır.
Fidan Hacızadə
Sfera.az
