İranla münaqişə ilə bağlı ABŞ-nin ümumi xərcləri 1 trilyon dollara çata bilər.
Sfera.az xəbər verir ki, bunu “CNN”in Harvard Kennedi Məktəbinin eksperti Linda Bilmesin təqdim etdiyi hesablamada bildirilib.
Qiymətləndirmədə yalnız qısamüddətli xərclər deyil, həm də uzunmüddətli perspektivlər nəzərə alınıb. Xüsusilə, ABŞ-nin dəqiq idarə olunan silahlar da daxil olmaqla, sursat ehtiyatlarını doldurması üçün illər lazım olacaq. Məsələn, tək bir istifadə olunmuş “Tomahawk” raketinin dəyəri hazırda 2 milyon dollar qiymətləndirilir, lakin onun dəyişdirilməsi təxminən 3,5 milyon dollara başa gələ bilər.
Münaqişədə istifadə olunan avadanlıqların, o cümlədən təyyarədaşıyan zərbə qruplarının orta və uzunmüddətli texniki xidməti növbəti dörd-beş il ərzində onlarla, hətta yüz milyardlarla dollara başa gələ bilər. Bundan əlavə, ABŞ münaqişədə iştirak edən 55 min hərbi qulluqçuya qarşı sosial öhdəliklərini yerinə yetirməli olacaq.
Ekspert həmçinin münaqişənin qlobal iqtisadiyyata təsirini də nəzərə alıb ki, bu da artıq ABŞ-nin özündə yanacaq və istehlak mallarının qiymətlərinin artmasına səbəb olub. Xüsusilə, ABŞ-də bir qallon benzinin (3,79 litr) orta qiyməti tezliklə 5 dollara qədər yüksələ bilər.
Çərşənbə axşamı Pentaqon ABŞ-nin İrana qarşı hərbi əməliyyatının dəyərinin artıq 29 milyard dollara yaxınlaşdığını açıqladı. Bu məbləğə avadanlıqların təmiri və dəyişdirilməsi xərcləri, eləcə də regionda personalın saxlanılması üçün əməliyyat xərcləri daxildir.
Firuzə Əliyeva
Sfera.az
