Makademya fındığı sağlam yağlar, minerallar və antioksidantlarla zəngin olması ilə diqqət çəkir.
Sfera.az xəbər verir ki, bu çərəz ürək-damar sağlamlığının qorunmasına, pis xolesterinin (LDL) azalmasına və qan şəkərinin tarazlanmasına kömək edə bilər.
Vətəni Avstraliya olan makademya fındığı qaymaqlı teksturası və yüngül şirin, kərə yağına bənzər dadı ilə tanınır.
Qeyd olunur ki, makademya fındığı xüsusilə manqan, B1 vitamini və mis baxımından zəngindir. Tərkibindəki yağların böyük hissəsi ürək üçün faydalı hesab edilən təkli doymamış yağlardan ibarətdir. Məlumata görə, məhsulun 100 qramında 718 kalori, 75,8 qram yağ, 7,9 qram zülal, 13,8 qram karbohidrat və 8,6 qram lif var.
Mütəxəssislər bildirirlər ki, makademya fındığı ürək və damar sağlamlığını dəstəkləyir, güclü antioksidant təsir göstərir, həzmi yaxşılaşdırır və beyinlə sümük sağlamlığı üçün faydalıdır. Bununla yanaşı, yüksək kalorili olduğu üçün bu çərəzin normadan artıq qəbul edilməsi tövsiyə olunmur. Gündəlik 10-12 ədəd makademya fındığının kifayət etdiyi bildirilir.
Həmçinin vurğulanır ki, allergiyası olan şəxslərdə məhsul ciddi reaksiyalara səbəb ola bilər. Həddindən artıq istifadə isə köp və mədə narahatlığı yarada bilər.
Niyaz Hacıyev
Sfera.az
