Cənubi Peruda, İka şəhəri yaxınlığında nəhəng qum təpələrinin arasında gizlənən Huacachina fotolarda nağıl səhnəsini xatırladır. Xurma ağacları və qədim üslublu tikililərlə əhatələnmiş sakit laqun səhranın sükutu ilə unikal harmoniya yaradır. Buraya gələnlər vaxtın yavaşladığını hiss etdiklərini deyir. Huacachina, görüldükdən sonra uzun müddət yaddaşdan silinməyən nadir məkanlardan biridir.
Sfera.az bildirir ki, qəsəbə səthə çıxan təbii yeraltı su mənbələrinin yaratdığı laqunun ətrafında formalaşıb. Küləklər qum təpələrinin formasını daim dəyişsə də, göl ətrafındakı yaşıl zolaq öz varlığını qoruyur. Sakit okeandan uzaqda yerləşməsinə baxmayaraq, burada rütubətli hava hiss olunur.
1960-cı illərdə laqunun suları müalicəvi hesab edilirdi. Həmin dövrdə varlı Peru ailələri buranı istirahət mərkəzinə çevirib. İspan müstəmləkə dirçəlişi üslubunda tikilmiş otel və restoranlar bu gün də keçmiş əzəmətin izlərini daşıyır.
Əfsanələrlə yaşayan oazis
Huacachina əfsanələrlə də tanınır. Rəvayətlərdən birinə görə, İnka şahzadəsi Huacca Çin gözəlliyi ilə hər kəsi valeh edirdi. Qaçarkən paltarı quma çevrilib, güzgüsü isə yerə düşərək laqunu yaradıb. Şahzadə suya girərək su pərisinə çevrilib.
Başqa bir hekayədə isə laqun sevgilisini itirən şahzadənin göz yaşlarından yaranıb. Keçua dilində “Huacachina” “ağlayan qadın” mənasını verir. Bu sirli hekayələr qəsəbənin atmosferini daha da mistik edir.
Huacachina “Amerikanın Oazisi” kimi tanınır. Gəzinti yolları, körpülər və laqunu əhatə edən evlər şəhərin özünəməxsus simasını formalaşdırır. 2017-ci ildə The Telegraph Huacachinanı dünyanın ən təsirli 21 məkanı siyahısına daxil edib. Latın Amerikasından seçilən yeganə məkan olub.
Gün batanda qum təpələri rəngini dəyişir, axşamlar laqun işıqlarla əhatələnir. Səhranın sükutu və suyun əksi bu oazisi illər keçsə də cazibəsini itirməyən bir məkana çevirir.
Aynil
Sfera.az
